आयुर्वेद सेवा मन्थली अस्पतालको पुरानो भवनबाट विस्तारको तयारी

रामेछाप । आर्थिक वर्ष २०८०÷८१ मा ३० हजारभन्दा बढी सेवाग्राहीले सेवा लिएको रामेछापको आयुर्वेद तथा वैकल्पिक चिकित्सालयले अब मन्थली अस्पतालको पुरानो भवनबाट सेवा विस्तार गर्दैछ। नागरिकको विश्वास बढ्दो देखिएसँगै चिकित्सालयले भौतिक पूर्वाधार अभावकै बीच सेवा विस्तारको पहल थालेको हो।
बिहीबार मन्थलीमा आयोजित पत्रकारसँग अन्तरक्रिया कार्यक्रममा चिकित्सालयका अध्यक्ष नवराज पथिकले अस्पतालको पुरानो भवनबाटा असार २५ गतेदेखि सेवा सुरु गर्ने तयारी भइरहेको जानकारी दिए । “त्यस दिन रामेछाप जिल्ला पूर्ण खोप जिल्ला घोषणा हुँदैछ र बागमती प्रदेशका स्वास्थ्य मन्त्रीको पनि आगमन हुने भएकाले, सोही दिन नयाँ स्थानबाट सेवा शुभारम्भको योजना छ,” उनले भने ।
मन्थली नगरपालिकाले हालको लागि अस्पतालको खाली भवन प्रयोग गर्न स्वीकृति दिएको र अहिले सरसफाइ तथा विद्युतीय वायरिङको काम भइरहेको अध्यक्ष पथिकले बताए। हाल चिकित्सालयसँग २ रोपनी मात्र जग्गा भए पनि कम्तीमा ६ रोपनी आवश्यक पर्ने मापदण्ड अनुसार थप जग्गा प्राप्तिका लागि पहल भइरहेको समेत अध्यक्ष पथिकले जानकारी दिए ।
चिकित्सालय प्रमुख डा. पुनम नेपालका अनुसार, आयुर्वेदप्रति जनविश्वास बढ्दो छ। “आधुनिक औषधिको विकल्पका रूपमा आयुर्वेद रोज्नेको संख्या बढ्दैछ,” उनले भनिन् ।
पत्रकारहरूले कार्यक्रमका क्रममा संरचनागत चुनौती, जनविश्वास विस्तार र सेवा प्रभावकारिता सुनिश्चित गर्न सुझावसमेत प्रस्तुत गरेका थिए।