‘२०८४ मा माओवादी केन्द्रले एक्लै सरकार बनाउँछ’ भुषाल
रामेछाप । द्वन्द्वका समयमा सहिद भएकाहरूको सपना पुरा गर्न सहिदका परिवार तथा आफन्तहरूको सल्लाह सुझाव संकलन गरी सोही मर्म अनुरूप आगामी दिनमा अगाडी बढ्ने नेकपा माओवादी केन्द्रकी उपाध्यक्ष तथा पूर्व ऊर्जा तथा जलस्रोत मन्त्री पम्फा भुषालले बताएकी छिन् । बिहीवार दोरम्बा शैलुङ गाउँपालिकाको दोस्रो सम्मेलनलाई तथा ३० औँ जनयुद्ध दिवसलाई संवोधन गर्दै भुषालले आगामी २०८४ को निर्वाचनलाई लक्षित गर्दै २०६४ को जनमतलाई पुनस्र्थापित गर्न जुझारुका साथ मतदाता समक्ष पुग्न नेता तथा कार्यकर्तालाई अनुरोध गरिन् ।
उनले भनिन् – अव २०६४ कै माओवादी बन्न पर्छ । नेकपा माओवादी केन्द्रले एक्लै प्रतिस्पर्धा गरेर वडा देखी केन्द्र सम्म जित्ने पार्टी बन्ने भन्ने संकल्प गरेका छौँ । २०८४ मा हामी एक्लै चुनाव लडेर, जितेर एक्लै सरकार बनाउन आउँछौँ ।
कार्यक्रममा बोल्दै भुषालले अहिलेको सरकार नीति नै बनाएर भ्रष्टाचार गरेको आरोप लगाएकी छिन् । उनले भनिन् – अहिलेको सरकारले इतिहास नै बिर्साएर भ्रष्टाचारको थालनी गरेको छ । भुषालले रवि लामिछानेको बचाउ गर्दै उनी माथि राजनीतिक प्रतिसोध साध्ने काम भएको समेत बताएकी छिन् । आफ्नो दलका मानिसहरूको बचाउमा लागेको अहिलेको सरकारले भ्रष्टाचारीलाई प्रशय दिएकोले यो बेतिथि सहेर बस्न नसकिने समेत उनले बताएकी छिन् ।
भ्रष्टाचारीलाई बचाउने, राजस्व छली गर्ने र जनताको आँखामा छारो हालेर यसरिनै सरकार अगाडी बढ्ने हो भने नेकपा माओवादी केन्द्र हेरेर नबस्ने समेत उनले बताएकी छिन् । उनले भनिन्– हामी अहिलेको सरकारका जानेवाला छैनौ । बाँकी समय निर्धक्क चलाउनुस् सरकार, तर सरकार संविधान अनुसार चल्न प¥यो ।
माओवादी केन्द्रका केन्द्रीय सदस्य तथा जिल्ला समन्वय इन्चार्ज श्याम कुमार श्रेष्ठ , केन्द्रीय सदस्य तथा प्रदेश सभा सदस्य माननीय युवराज चौलागाँई, केन्द्रीय सदस्य सुनिता कुमारी गौतम, वैकल्पिक केन्द्रीय सदस्य तथा दोरम्बा शैलुङ गाउँपालिका अध्यक्ष मैन कुमार मोक्तान लगायत बत्ताहरूले आगामी निर्वाचनमा सबै एक जुट भई २०६४ को निर्वाचनको भन्दा राम्रो माओवादी बन्न नेता तथा कार्यकर्ताहरूमा अपिल गरेका थिए ।
