स्कुटरको ठक्करबाट मन्थलीमा मृगको मृत्यु, दुई जना घाइते
रामेछाप । जिल्लाको मन्थली नगरपालिका–१ मच्छेडाँडीस्थित मन्थली–सालु- देउराली भित्री सडक खण्डमा सोमबार बिहान स्कुटरको ठक्करबाट एउटा जंगली मृगको घटनास्थलमै मृत्यु भएको छ। दुर्घटनामा परि स्कुटरमा सवार दुई जना घाइते भएका छन्।
मच्छेडाँडीबाट मन्थलीतर्फ आउँदै गरेको बागमती प्रदेश ०२–०६७ प १६२३ नम्बरको स्कुटरअघि एक्कासि मृग आएपछि अनियन्त्रित भई दुर्घटना भएको हो।
दुर्घटनामा परी स्कुटर चालक रामेछाप नगरपालिका–८ सल्लेका १८ वर्षीय सन्जिब तामाङ र पछाडि सवार सोही ठाउँका १० वर्षीय जेसीज तामाङ घाइते भएका छन्। चालक तामाङको बायाँ हातको कुहिनो र दुवै खुट्टामा सामान्य चोट लागेको छ भने उनको अवस्था सामान्य रहेको छ। पछाडि सवार १० वर्षीय जेसीज तामाङको पेट र टाउकोमा चोट लागेको र अवस्था मध्यम रहेको प्रहरीले जनाएको छ। मन्थली अस्पतालमा उपचार पछि थप उपचारको लागि १० वर्षीय जेसीज तामाङलाई काठमाडौ लगिएको प्रहरीले जनाएको छ ।
जिल्ला प्रहरी कार्यालय रामेछापबाट करिब २ किलोमिटर पूर्व-दक्षिणमा पर्ने घटनास्थलमा खबर प्राप्त हुनासाथ प्रहरी वरिष्ठ हवल्दार रामदिनेश राय यादवको कमाण्डमा टोली खटिएर दुर्घटनास्थल सुरक्षित राखेको थियो।
करिब २० किलोग्राम तौल भएको मृत मृगको व्यवस्थापनका लागि डिभिजन वन कार्यालय रामेछापको टोलीसमेत घटनास्थल पुगिसकेको छ। दुर्घटनाग्रस्त स्कुटरलाई जिल्ला प्रहरी कार्यालय रामेछापले नियन्त्रणमा लिएको छ भने घटनाका सम्बन्धमा थप अनुसन्धान भइरहेको प्रहरीले जनाएको छ।
