प्रधानमन्त्री दैवी प्रकोप उद्धार कोषका नाममा ठगी गर्ने रामेछापका भगवान कार्की पक्राउ
मन्थली (रामेछाप), भदौ १४ — बाढी प्रभावितका लागि राहत संकलन गर्ने बहानामा कृत्रिम बौद्धिकता (Chat GPT) को प्रयोग गरी नक्कली बैंक स्टेटमेन्ट बनाएर रकम ठगी गर्न खोज्ने एक युवकलाई रामेछाप प्रहरीले पक्राउ गरेको छ।
पक्राउ पर्नेमा रामेछापको गोकुलगंगा गाउँपालिका–२, ठोसेका ३२ वर्षीय भगवान कार्की रहेका छन्।
जिल्ला प्रहरी कार्यालय रामेछापका अनुसार कार्कीले गत भदौ १० गते रसुवा जिल्लास्थित भोटेकोशी नदीमा आएको बाढीका कारण प्रभावित भएकाहरूका लागि सरकारले स्थापना गरेको ‘प्रधानमन्त्री दैवी प्रकोप उद्धार कोष’ मा आफूले १ लाख २० हजार रुपैयाँ सहयोग गरेको भन्दै सामाजिक सञ्जालमा भ्रम फैलाएका थिए।
कार्कीले च्याट जीपीटी (Chat GPT) को प्रयोग गरी १ लाख २० हजार रुपैयाँ सहयोग गरेको देखाउने नक्कली डिजिटल स्टेटमेन्ट तयार पारेका थिए। त्यसपछि उक्त फर्जी स्टेटमेन्टसँगै आफ्नै व्यक्तिगत क्यूआर कोड (QR Code) जोडेर सामाजिक सञ्जालमा पोस्ट गर्दै सर्वसाधारणबाट राहत रकम संकलन गर्ने प्रयास गरेको प्रहरी अनुसन्धानबाट खुलेको छ।
जिल्ला प्रहरी कार्यालय रामेछापका सूचना अधिकारी तथा प्रहरी निरीक्षक कमल राउतका अनुसार कार्कीलाई नियन्त्रणमा लिई थप अनुसन्धान प्रक्रिया अघि बढाइएको छ। ‘दैवी प्रकोपको समयमा विपद्मा परेका नागरिकका नाममा भ्रम सिर्जना गरी व्यक्तिगत लाभ लिन खोज्नु गम्भीर अपराध हो,’ प्रहरी निरीक्षक राउतले भने, ‘घटनाबारे थप अनुसन्धान भइरहेको छ।’
प्रहरीले सर्वसाधारणलाई सामाजिक सञ्जालमा आउने यस्ता शंकास्पद खाता र क्यूआर कोडमा रकम जम्मा नगर्न र आधिकारिक निकायमार्फत मात्र सहयोग गर्न समेत आग्रह गरेको छ।
