हँसिया बोकेर बिहानै विटार पार्कमा उपमेयर
रामेछाप । शनिवार बिहानै रामेछाप नगरपालिकाकी उपप्रमुख बाल कुमारी कार्की विटार पार्क पुगिन् । झट्ट हेर्दा बिहानै त्यो पनि शनिवार भएको कारणले ’मर्निङवाक’ अथवा घुमघामका लागि निस्केको अड्कल सहजै काट्न सकिन्थ्यो ।
तर उनी विटार पार्क पुगे पछि हँसिया निकालिन् र फटाफट झाडी फाँड्न लागिन् । उनीसँगै रामेछाप नगरपालिका वडा नं. ८ का वडाध्यक्ष सन्तोष तामाङ र केही स्थानीयहरूको समेत उपस्थिति भयो । सबै जना धमाधम विटार पार्क सरसफाइमा लागे ।हामीले वडाध्यक्ष तामाङलाई खुसुक्क सोध्यौँ–’आज केही विशेष छ हो वडाध्यक्ष ज्यू?’
पार्कमा घाँस र झाडीले भरिएका कारण पार्क घुम्न आउने हरूलाई असहज भएको गुनासो आउन थाले पछि उपमेयर कार्कीको अनुरोधमा शनिवार बिहानै पार्कको सरसफाइमा लागिएको वडाध्यक्ष तामाङले बताए । उनीहरू सहित पार्क व्यवस्थापन समितिका पदाधिकारी र स्थानीय हरूको संयुक्त प्रयासमा विटार पार्कको सरसफाई गरिएको वडाध्यक्ष तामाङ थपे।
विटार पार्कलाई नमुना पार्कको रूपमा विकास गरी आन्तरिक तथा बाह्य पर्यटकहरूको आगमन बढाउन माग हुँदै आएको छ । नागरिकको माग नै जनप्रतिनिधिको प्रथम कार्य योजना हुने भएकोले रामेछाप नगर पालिकाले विटार पार्कको व्यवस्थापनमा चासो बढाएको उपप्रमुख कार्कीले बताइन् । नगरपालिकाको कार्यालयबाट १० किलो मिटरको दुरीमा रहेको पार्कको निर्माण सँगै यसको उचित व्यवस्थापन गर्न सके आन्तरिक तथा बाह्य पर्यटकहरूको आगमन बढ्ने उपप्रमुख बाल कुमारी कार्कीले बताइन् । उनले भनिन् पार्कको विकासको लागि नगरपालिकाले आवश्यक सहयोग गर्नु पर्छ भन्ने मान्यता नगरले पनि राखेको छ ।
नगरपालिकाले चालु आर्थिक वर्षमा १० लाख रुपैयाँ विनियोजन समेत गरेको छ । जुन बजेटलाई पनि पार्क व्यवस्थापनमा खर्च गर्ने तयारी व्यवस्थापन समितिले गरेको छ ।
सदरमुकाम मन्थली बजारबाट ३ किलो मिटरको दुरीमा रहेको पार्कको अवलोकन र मनोरञ्जनका लागि मन्थली बजारबाट दैनिक दर्जनौँको सङ्ख्यामा आन्तरिक पर्यटकहरू जानाले पनि पार्कको महत्त्व बढेको पार्क व्यवस्थापन समितिका अध्यक्ष सुनिल कुमार राय माझी बताउँछन् ।
